عالم الاكسسوارات

الحوار ده مع مصممة الحلي "سحر سامي" علشان نتعرف منها على إيه الجديد في عالم الإكسسوار..


نشوف الحوار مع بعض


واضح من خلال إكسسواراتك إنك متأثرة بالذوق الفرعوني والشرقي؟


أنا أهوى صناعة الحلي من وأنا صغيرة وأشعر بسعادة بأي شيء مصنوع باليد،
ولا أسعى من وراء الحلي التجارة والمكسب؛ لأنه فن وإحساس بالدرجة الأولى...





وأنا بحب الإكسسوارات الفرعونية والهندية جدّاً، وهنلاقي فيهم تفاصيل
كثيرة، وألوان متداخلة مع بعضهم بتعطي في النهاية جمالا ورُقِيّا...
وطبعاً مفيش أحسن من الإكسسوارات الفرعونية اللي العالم كله بينبهر بها.


وازاي بتستمدّي أفكار تصميماتك؟


الفكرة هي أهم من التصميم، وأول حاجة أفكر في شكل ما، وأرسمه على ورقة
صغيرة، والخطوة الثانية على الحجر نفسه، وأحيانا أتخيل شكل معين، وإحساسي
بياخدني لشكل آخر مختلف تماماً. ورغم أني أعشق الكلاسيكية والأحجار
القديمة لكني أحرص على أني أضيف إليها روح العصر الحديث، وأحب دائماً
الإبداع والابتكار.





عرفنا إنك بتعرضي تصميماتك في معارض في أوروبا، إيه رد فعل الغرب على أعمالك؟


عرضت إكسسواراتي في معارض في "إنجلترا"، و"النمسا"، و"فرنسا"،
و"ألمانيا" والناس هناك أعجبوا بها جدّاً. وأكثر شيء بيبهر الغرب هو المزج
بين اللمسة القديمة والحديثة في أعمالي. وأنا بحب أرضي جميع الأذواق في كل
مكان في العالم.


هل الإكسسوار له موضة وبتتغير كل سنة؟


ما أقدرش أقول إن فيه موضة ثابتة لكن الموضة بتكون في شكل التصميم في
القطع الكبيرة والصغيرة فمثلا اللولي موضة جدّاً، وممكن يتلبس في أي وقت،
والقطع الكبيرة والسلاسل الطويلة بتعطي حرية في الحركة.





إيه هي خامات الإكسسوارات والأحجار اللي بتستخدميها؟


الخامات ممكن تدخل مع بعضها، ولكن بألوان متناسقة، والألوان هي اللي
بتدي إحساس مختلف، وشكل مختلف، وكل الألوان تتناسب مع بعضها.. المهم في
درجات الألوان..


وأنا أعشق القطع الكبيرة من الإكسسوار، وأنواع الأحجار اللي باستخدمها
هي "الفيروز" و"المرجان" و"الياقوت" و"الصدف" و"اللولؤ"... والمهم إني
أوظفها بشكل أنيق وجميل..


وعلى فكرة الأحجار لها تأثير نفسي فالأحجار الكريمة بتعالج الاكتئاب
والاضطرابات والصداع النصفي والأرق، وبتعمل انعكاسات مع الضوء تؤدي إلى
ارتياح نفسي كبير.





إزاي البنت تختار الإكسسوار المناسب لها؟


أول حاجة وأهم حاجة لازم العين تكون مستريحة.. لو العين ارتاحت يبقى
الإكسسوار مناسب.. لكن فيه قواعد عامة زي إن البنت اللي رقبتها قصيرة لازم
تلبس سلاسل طويلة ولو صدرها كبير لا ترتدي دلاية، ولو لابسة درابيه أو
قصات لا ترتدي إكسسوارات على هذه القصات، ولازم تراعي الموديل واللون..


وإذا كان الفستان نقشته كبيرة ممكن تلبس سلاسل طويلة، والنقشة الصغيرة اللي فيها تفاصيل كثيرة تبعد عن الإكسسوارات الكبيرة.





ولو البنت لابسة حاجة سادة ممكن تلبس كوليه موديل كبير، وبأي حجم أو
أي شكل، وبالنسبة للبنت اللي وجهها طويل تضع كوليه كبير ومدوّر...

والشعر القصير يتناسب معاه الكوليه الناعم، وإذا كانت البنت محجبة ممكن
تضع إكسسوار على الطرحة. وإذا كانت الطرحة إسبانش تضع أي موديل.. لكن لو
الطرحة تقليدية تضع الكوليه عند منتصف الصدر.






هل اختيار الإكسسوار بيكشف شخصية البنت؟


نعم إلى حد كبير.. فمثلا الفتاة الهادئة الكلاسيكية تميل إلى الإكسسوار
الكلاسيك والفضة والذهب، أما الفتاة المودرن والشقية فتميل إلى الأحجار
والقطع الكبيرة والنحاسيات.


هل المكان بيحدد شكل الإكسسوار المناسب له؟


آه طبعاً.. فلو البنت في مكان مفتوح زي الجامعة مثلا وبتتحرك كتير فإنها لا ترتدي السلاسل الطويلة...

أما إذا كانت موظفة فترتدي أي موديل من الإكسسوارات..

أما الأحجار فتستخدم في أي وقت ما عدا الأحجار البراقة والشفافة التي تفضل
عادة في السهرة، ويفضل في السهرات أن نرتدي الإكسسوارات الإستراس الخاصة
بالسهرات.







رأيك إيه في إن البنت تلبس أكتر من خامة للإكسسوار؟


الموضوع ده بيرجع لشخصية البنت، يعني فيه بنات بتحب الأحجار الكبيرة
والعكس، لكن أنا أفضّل القطع الكبيرة في خامة واحدة فقط.. يعني البنت تلبس
كوليه كبير مع حلق صغير وأنسيال وساعة متوسطة الحجم، ولا أفضّل أكتر من
قطعة كبيرة ولا ترتدي كوليه مع بروش، ولا ترتدي المرجان مع الأسورة اللولي.


عايزين نتعرف على أفكارك في تصميم الحلي؟


فيه كوليه مكون من "حجر لبس" معرّق بالذهب، وداخل معاه الكهرمان
والمرجان؛ لأنه بيعطي شياكة كبيرة، ومعاه فص هندي ويمشي جدّاً مع الجينز
والكاجوال.





وفيه تصميم آخر لبنت لابسة أبيض ولابسة سلاسل كثيرة عبارة عن لولي وصدف
والصدف بيلمع قوي، والصدف في نفس الوقت بيعطي شكل الكاجوال، وبيكون له
لمعة شوية، والموديل فيه سلاسل كثير.


وهناك كوليه آخر بصورتين مرة ذهبي ومرة روز، والكوليه كبير، وعبارة عن
قطع شراشيب كثيرة وممكن تتناسب مع النهار والحجر بتاعه شفاف وفيه لمعة.





إيه سبب انبهار البنات بالإكسسوار أكتر من الذهب؟


لأن البنت بتحب التغيير والموضة، بالإضافة إلى أن التطور الذي طرأ على
الإكسسوارات بألوانها وتصميماتها ومزجها بالذهب أصبحت تعمل نوعا من
الإبهار، والإكسسوارات أصبحت تعطي أناقة، وتزيد من جمال اللبس بالإضافة أن
أسعارها لا تقارن بالذهب، وخاصة الإكسسوارات الفرعونية اللي بتقبل عليها
كل الأعمار.





في النهاية عايزين نعرف ازاي تحافظ البنت على الإكسسوار وازاي تنظفه؟


بالنسبة للذهب والفضة نبعدها عن البارفانات أو الكريمات، وبعد ما
نقلعها نضعها في مكان مقفول، وبعيدا عن الهواء؛ لأن الهواء بيساعد على
أكسدة الفضة، وأحيانا هناك أنواع من العرق بتسبب صدأ للفضة.


والتنظيف بيكون عن طريق "كربونات صودا" أو "بيكنج بودر" وبعد كده
ننشفها بفوطة، أما بالنسبة للأحجار فتنظف بالماء، واللولي ينظف عن طريق
زيت البرافين..
ولازم نضع الإكسسوارات في أدراج واسعة وبعيدة عن بعضها.






منقول